यस्तो छ ९ लाख कांग्रेसजनको १२१ मर्यादाक्रम, प्रधानमन्त्री तेस्रो नम्बरमा (सूचीसहित)
काठमाडौं । देशकै सबैभन्दा पुरानो पार्टी नेपाली कांग्रेसले संगठनात्मक संरचनाभित्र १२१ वटा ओहोदाको वरीयता निर्धारण गरी केन्द्रीय कार्य समितिमा प्रस्ताव गरेको छ ।
आइतबारदेखि जारी केन्द्रीय कार्य समिति बैठकमा पेश भएको वरीयता क्रमको एक नम्बरमा केन्द्रीय सभापति रहेका छन् भने अन्तिम १२१ मा नेपाली कांग्रेस सदस्य रहनेछन् । नेपाली कांग्रेस सदस्य भन्नाले क्रियाशील सदस्यता नलिएका प्रारम्भिक कांग्रेस बुझिन्छन् ।
सभापतिपछिको वरीयतामा पूर्वसभापति रहने व्यवस्था गरिएको छ । यो वरीयताक्रम केन्द्रदेखि सबै तहका समितिमा कायम रहेको छ ।
प्रधानमन्त्रीको वरीयता पूर्वसभापतिपछि अर्थात् तेस्रो स्थानमा प्रस्ताव गरिएको छ ।
त्यसपछि पूर्व प्रधानमन्त्री रहने र पाँचौँ नम्बरमा संसदीय दलको नेता रहनेछन् । यद्यपि कांग्रेसमा सभापति, प्रधानमन्त्री र संसदीय दलको नेता प्रायः एकै व्यक्ति रहने गरेका छन् भने सो पार्टीमा अहिले कोही पनि पूर्वप्रधानमन्त्री जीवित छैनन् ।
पूर्वउपप्रधानमन्त्रीको मर्यादाक्रम मुख्यमन्त्रीभन्दा पछि राखिएको छ भने भ्रातृ तथा शुभेच्छुक संस्थाका केन्द्रीय अध्यक्षको मर्यादाक्रम कांग्रेसका महासमिति सदस्यपछि अर्थात् ४० औँ नम्बरमा तोकिएको छ ।
