विश्वप्रकाशलाई भेटपछि गगनले भने, ‘अब देशलाई हाम्रो खाँचो छ’
मंसिर १३ –नागरिकको भरोसालाई जोगाउन प्रधानमन्त्री बन्नका लागि आफ्नो आवश्यकता रहेको नेपाली कांग्रेसका महामन्त्री गगनकुमार थापाले बताएका छन् । उनले लोकतन्त्रको सबैभन्दा महत्त्वपूर्ण कुरा भनेकै चुनाव र नागरिकको भरोसा भएकाले अहिलेको परिस्थितिमा युवाहरूको नेतृत्व देशलाई आवश्यक भएको बताएका हुन् ।
उनले नेपाली कांग्रेसको तर्फबाट युवा पुस्ताले अब पार्टी र देशको नेतृत्व गर्ने समय आइसकेको बताए । मंगलबार संसदीय नेताको लागि पार्टीका अर्का महामन्त्री विश्वप्रकाश शर्मासँगको भेटपछि आफ्नै निवासमा महामन्त्री थापाले नेपाली कांग्रेसको युवा पुस्ताले देश हाँक्नुपर्छ भन्ने कुरा पार्टीको लागि पनि आवश्यक रहेको बताए ।
थापाले भने, ‘प्रधानमन्त्रीको दाबी गर्ने कुरालाई स्वाभाविक रूपमा लिनुपर्छ । हाम्रो संसदीय व्यवस्थाभित्र अभ्यास गरिरहेको पार्टी हो नेपाली कांग्रेस । त्यसैले संसदीय दलभित्र नेता हुने चाहना फरक फरक नेताहरूले राख्ने, बीचमा छलफल हुने, बहस हुने कुरालाई एकदमै स्वाभाविक रूपमा लिनुपर्छ । मैले यसलाई स्वाभाविक रूपमा लिएको छु । एउटा बिन्दुमा मैले रामचन्द्र पौडेललाई मत हाले संसदीय दलको नेता बनाएको हो । अर्को एउटा बिन्दुमा प्रकाशमान सिंहलाई खुला घोषणा गरेर संसदीय दलको नेतामा भोट हालेको हो । ’
उनले अधिकांश कांग्रेस सांसदहरूसँग टेलिफोनबाट वार्ता भएको र केही नेताहरूलाई भने भेटेरै कुरा गरिसकेको भन्दै उनले सबै नेताहरूले सहयोगको वाचा गरेको बताए । महामन्त्री थापाले अबको देशको नेतृत्व नेपाली कांग्रेसले नै गर्ने र कांग्रेसले नेतृत्व गर्दा नयाँ नेतृत्व दिन सके मात्रै नागरिकहरूलाई आश्वस्त बनाउन सकिने बताए । उनले नयाँ कुरा दिन नसके प्रारम्भबाट नै विश्वासको कडी टुट्ने बताए । महामन्त्री थापाले नयाँ नेतृत्वको बारेमा पार्टी सभापति, वरिष्ठ नेता र अग्रज नेताहरूसँग कुरा गर्न बाँकी रहेको र अग्रज नेताहरूकै समर्थन र आशीर्वादमा आफूले कांग्रेसबाट देशको अबको नेतृत्व गर्ने दाबी गरे ।
उनले भने, ‘निर्वाचन भर्खर सम्पन्न भएको छ । समानुपातिक निर्वाचनको अन्तिम मत परिणाम आउन अझै केही समय बाँकी छ । निर्वाचित हुनुभएको सांसद साथीहरू पनि शुभकामना आदानप्रदानका लागि आफ्नो निर्वाचन क्षेत्रमा हुनुहुन्छ । प्रायः सबै साथीसँग टेलिफोनबाट संवाद भएको छ । केहीसँग भेटघाट भएको छ । यो कुनै व्यक्ति के हुने भन्ने कुरा प्रधान विषय होइन । नेपाली कांग्रेसले नै यो संसद्को निर्वाचनपछि देशको नेतृत्व दिने हो ।
