दमकल भन्ने बित्तिकै आगलागीमा प्रयोग गरिने वस्तु भन्ने बुझिए पनि आगलागीबाट क्षति कम गर्न प्रयोग गरिने दमकल पक्की सडकमा पुग्नै सक्दैन भन्दा अचम्म पनि लाग्छ । सोमवार बिहान साढे ९ बजे तिर मङ्गलसेन नगरपालिका नजिकै एक घरमा आगलागी भयो । तर, त्यति धेरै प्रयोग नै नभएको मङ्गलसेन नगरपालिकाको दमकल घटना स्थलमा पुग्न सकेन ।
आगलागीका बेला प्रयोग हुने दमकल अछामको मङ्गलसेन नगरपालिका अगाडी प्रदर्शनीका लागी राखिएको जस्तै देखिन्छ ।
नगरपालिका नजिकैका स्थानीय नारायण ढुङ्गानाको घरमा आगलागी भइरहेको थियो स्थानीय तथा सुरक्षाकर्मीको फौजले बाल्टिनमा पानी भर्दै र माटो छ्याप्दै आगो निभाउने प्रयास गरे पनि घर भित्रका सबै सामान पूर्ण रूपमा जलेर नष्ट भइसकेका थिए ।
सामाजिक सञ्जाल फेसबुकमा स्टाटस लेख्दै घरधनीले यसो भनेका छन् स्टाटस दमकल सवारी चालक समेत नराखेको मङ्गलसेन नगरपालिकाले नगरको टिप्पर चालकबाट काम चलाऊ गरेको पाइएको छ । कुनै पनि सवारी साधन नियमित सञ्चालन हुँदा पनि २० वर्ष बढी कुदेको हामीले देखेकै छौँ । तर, खरिद गरिएको पाँच वर्ष नै नभएको अनि नियमित सञ्चालन नहुने दमकल गुड्न नसक्नु कतिसम्मको लापरबाही हो आफैँमा स्पष्ट छ ।
सोमवार नगरपालिकाकै अगाडी भएको आगलागीको घटनामा दमकल पठाउन नसकेको नगरपालिकाले भने आत्मगलानी गरेको छ । दमकलको ब्याट्री र प्रेसर बिग्रेका कारण दमकल सञ्चालन हुन नसकेको नगरपालिकाका विपत व्यवस्थापन शाखा प्रमुख नरेश कठायतले बताए ।
उनले भने, नगरपालिकाकै अगाडी घर जलिरहेको थियो, हामीले दमकल पठाउन धेरै प्रयास गयौँ तर दमकल सञ्चालन भएन । विपत व्यवस्थापनमा प्रभावकारी काम गर्न नसक्दा आफैलाई लाज लागेको छ । आगामी दिनमा विपत व्यवस्थापन तथा प्रतिकार्यका लागी २४ यै घण्टा सेवा उपलब्ध गराउने कठायतले दाबी गरे ।
