पूर्णबहादुरको गृहजिल्लामा शेखरको शक्ति प्रदर्शन
सुर्खेत । नेपाली कांग्रेसभित्र १४ औँ महाधिवेशनपछि संस्थापन पक्षको दबदबा रहेका क्षेत्र हो, कर्णाली ।
सुर्खेत र समग्र कर्णालीमा अहिलेका पार्टी उपसभापति पूर्णबहादुर खड्का पार्टीभित्र निकै शक्तिशाली छन् । उनै खड्काको गृहजिल्ला सुर्खेतमा इतरपक्षको नेतृत्व गरिरहेका डा. शेखर कोइरालालाई बिहीबार गरिएको स्वागत र सम्मानले भने सबैको ध्यान तानेको छ ।
कोइराला पूर्वआप्रवासी समन्वय केन्द्रीय विभागको कार्यक्रमलाई सम्बोधन गर्न आएका हुन् । उक्त कार्यक्रम शुक्रबार मात्र हुने छ । तर उनी आउने खबर एक हप्ताअघि नै कांग्रेसभित्र चल्न थालेको थियो । सोहीअनुसार कोइरालाको सचिवालयबाट सुर्खेतका हरेक पत्रकारलाई केही दिनअघि नै सीधै फोन आएको थियो । कोइराला आउने थाहा पाएपछि इतरपक्ष र खड्का पक्षका प्रदेशभरका असन्तुष्टहरू केही दिनअघिदेखि नै वीरेन्द्रनगर आउन सुरु गरिसकेका थिए ।
बिहीबार बिहान सुर्खेत विमानस्थलमा जबर्जस्त रूपमा कोइरालाको भव्य स्वागत मात्रै भएन, दुबो, फूलमालाले सिँगारेर पार्टी कार्यालयमा ल्याइयो ।
संस्थापनइतर पक्षका नेता अर्थात् आउने महाधिवेशनमा सभापतिका दाबेदार कोइराला सुर्खेत विमानस्थलमा पुग्दा जुन दृश्य देखियो, केही दिनअघि पार्टी सभापति शेरबहादुर देउवा आउँदा पनि त्यस्तो थिएन । प्रधानमन्त्रीहरू आउँदा पनि त्यस्तो दृश्य देखिएको थिएन । कोइरालाको स्वागतमा विमानस्थल वरपर शक्ति प्रदर्शन नै गरियो ।
कोइरालाको स्वागतको अग्रमोर्चामा इतर पक्षधर अर्थात् कांग्रेस नेता हृदयराम थानी, भुपेन्द्रजंग शाहीलगायत थिए । पार्टीकै ठुलो नेता आउने भएपछि संस्थापन पक्षका नेता पूर्वमुख्यमन्त्री जीवनबहादुर शाही, प्रदेश पार्टी सभापति ललितजंग शाही लगायत नेताहरू पनि सहभागी थिए । तर इतरपक्षका नेताहरू जसरी चम्किएका थिए, त्यत्ति भाउ पार्टी संरचनाले दिएको भने थिएन ।
विमानस्थल बाहिरको दृश्य हेर्दा लाग्थ्यो यहाँ कुनै ठुलो मेला लाग्दै छ । एरपोर्ट चोकदेखि औद्योगिक क्षेत्रसम्म पूरै सडक मान्छे र सवारी साधनले छोपिएको थियो । बाजागाजासहित लाइन थियो भने विद्यालयका विद्यार्थीदेखि कर्मचारी, बुद्धिजीवीहरूको हुल थियो ।
‘खासै ठुलो कार्यक्रम पनि थिएन, जुन हिसाबले शेखर दाइको स्वागत भयो, खड्काबाट असन्तुष्ट नेता, कार्यकर्ता र इतर पक्षका नेताहरूले खड्काज्यूलाई देखाइनदिने भन्ने तरिकाले तयारी गरेको देखियो,’ कांग्रेसनिकट पत्रकारको संगठन प्रेस युनियनका एक वरिष्ठ पत्रकारले विमानस्थलमै रातोपाटीसँग भने, ‘केही दिनअघि शेरबहादुर दाइ पनि आउनुभएको थियो, यस्तो हुल, माला, र बाजागाजा देखिएन ।’
उनका अनुसार आउने महाधिवेशनमा संस्थापन पक्षबाट ‘पूर्ण दाइ’ लाई पनि भावी सभापतिका रूपमा हेरिएकाले र कोइरालाको पनि दाबेदारी रहेको कुरालाई जोडेर उनकै गृह जिल्ला र प्रदेशमा आफ्नो पक्षको ‘शक्ति छ है’ भन्न देखाउन पनि यस्तो गरिएको हुन सक्छ ।
हृदयराम थानी अहिले सांसदका अलवा पार्टीको कुनै पदमा छैनन् । तर कोइरालाको स्वागतमा थानी नै हर्ताकर्ता थिए । विमानबाट ओर्लिँदादेखि विमानस्थल बाहिर निस्किँदा भीड थाम्ने अग्रमोर्चामा थानी थिए । ‘खासमा हर्ताकर्ता देखिनुपर्ने पार्टीको संरचना हो, त्यो देखिएन,’ खड्का पक्षधर नै एक नेताले भने।
त्यसपछि छोटो पत्रकार सम्मेलनमा कोइरालाले आफूले सभापतिको उम्मेदवार हो भनेर भनिसकेको बताए । साथै उनले अहिले एमालेसँगको सहकार्यमा चलिरहेको सरकारको कामकारबाहीप्रति असन्तुष्टि व्यक्त गरे । ‘देश निकै नाजुक अवस्थामा छ, हामी सबैले खबरदारी गर्नुपर्छ,’ उनले भने ।
कोइरालाको स्वागतमा खड्काले आवश्यकताभन्दा बढी बल देखाएर थानी पक्षलाई चेप्न खोज्नु प्रत्युत्पादनक भएको बताउँछन् कांग्रेसका दैलेख पार्टी सचिव नारायण रेग्मी। ‘अहिले धेरैजसो नेता, कार्यकर्ता उहाँबाट असन्तुष्ट हुनुहुन्छ, त्यसैको संकेतका रूपमा लिएको छु,’ उनले भने।
खड्कालाई जिन्दगीभर साथ दिएका केही नेता अहिले शेखर पक्षमा खुलेर लागेका छन् भने केही भित्रभित्रै लागिरहेका छन् । सल्यानको जिल्ला सभापति, खड्काकै गृह जिल्लाकी र लामो सयम साथ दिएकी सांसद जानकी सिंह अहिले इतर खेमामा पुगेकी छन् । सिंह फूलमालासहित कोइरालाको स्वागतमा अग्रमोर्चामा थिइन् ।
सांसदहरू देवेन्द्र शाही, कृष्ण बिसी, इन्द्रा, शाही, सुरेश अधिकारी पनि इतर पक्षधर हुन् । एक अर्का नेताले भने, ‘निश्चित रूपमा खड्काको (पूर्णबहादुर) जिल्लामा शेखरको शक्ति देखिएकै हो ।’ अब आउने जिल्ला र प्रदेशको अधिवेशनमा खड्का पक्षको स्वाहा हुन्छ भन्ने आफूहरूको आकलन रहेको पनि उनले सुनाए ।
१४ औँ महाधिवेशनताका कर्णालीका १० मध्ये ९ जिल्लामा खड्का पक्ष हाबी भएको थियो । थानी पक्ष आफूले गुमाएको उक्त शक्ति अब फर्काउन चाहन्छ । कोइरालाको स्वागतले त्यो संकेत देखाइसकेको दैलेख जिल्ला सचिव रेग्मी बताउँछन् ।
किनभने खड्काले आफै पावरमा पुग्दा तल मिलाउन सकेनन्, अर्को प्रस्ट देखिने गरी काम गर्न सकेनन्,’ उनी भन्छन्, ‘सरकारमा पनि गए । विकास निर्माणमा दीर्घकालीन योजना पनि बनाएनन् । सुर्खेतमा, त्यो पनि आफ्नो निर्वाचन क्षेत्रमा मात्र केन्द्रित भए ।’ शेरबहादुर देउवापछि उनको टिममा गतिलो नेता कोही नभएको र शेखर नै विरासत धान्न सक्ने नेता भएको हुनाले पनि उनको पक्षमा लहर बढेको नेताहरूको भनाइ छ ।
कोइराला महाधिवेशनको पूर्वतयारीका रूपमा सुर्खेत आएका नेताहरूको बुझाइ छ । ‘अब चाहिने सभापति कोइराला नै हो भन्ने देखियो, सांकेतिक रूपमा खड्काविरुद्ध असन्तुष्टि प्रदर्शन देखियो,’ अर्का एक नेताले भने ।
खड्काले आफ्नो जिल्लामै मिलाउन नसक्दा केन्द्रमा पनि उनीप्रति विश्वास घट्दै गएको पनि ती नेताको दाबी छ । कुनै बेला थानी पक्षको एकछत्र बाहुल्य भएको सुर्खेतमा खड्का शक्तिमा उक्लिएसँगै थानी पक्षलाई पेलानमा पारेका थिए ।
इतर पक्षधर मानिएका युवा नेता भुपेन्द्रजंग शाहीले वरिष्ठ नेताको स्वागत दृश्यले स्वाभाविक राम्रै संकेत गरेको बताए । ‘स्वागतमा दुवै पक्षका नेताहरू आउनुभयो, एकताको सन्देश नै दियो नि,’ उनले भने ।
भव्य स्वागतपछि कोइराला सुर्खेत पार्टी कार्यालयमा कार्यकर्ता भेटघाट कार्यक्रम सम्बोधन गरी दिनभर शुभ होटलमा बसेका छन् । उनले प्रत्येक जिल्लाका टिमसँग एक्लाएक्लै गोप्य भेटवार्ता गरिरहेका छन् । ‘उहाँले आफ्नो शक्ति आर्जन गर्न खोज्नुभएको छ, सबै उहाँप्रति सकरात्मक पनि छन्,’ शुभ होटलमा भेटवार्ता गरेपछि बाहिर निस्किएका एक नेताले भने ।
शुभ होटलमा कोइरालाई भेट्न प्रदेश र जिल्ला नेताहरू समय कुरेर बसिरहेका छन्। ‘दिउँसोदेखि अहिलेसम्म भीड नै छ, दाइ (शेखर)ले भित्र एक्लाएक्लै भेटिरहनुभएको छ,’ त्यहाँ सहभागी अर्का एक नेताले भने।
